意大利5連勝都要踢附加賽？

2025/10/16

列迪古（右）助意大利炒起以色列。

next 1/1 pre

周三凌晨世界盃外圍賽歐洲區I組，意大利憑前鋒列迪古梅開二度，加上中堅基安盧卡文仙尼入波，主場以3比0擊敗以色列，取得5連勝，落後榜首挪威3分。由於意大利淨得球少過挪威16球，恐怕要有奇迹出現，先至可以獲得小組首名直接出線資格。

兩隊今場踢法非常進取，互相鬥攻，以色列曾創造唔少入波良機，但都失諸交臂。踢到上半場補時，意大利前鋒列迪古喺禁區內被對手踢跌，獲得12碼並親自操刀破網，為意大利打開紀錄。換邊之後，列迪古喺禁區邊左路起腳射入世界波，加上基安盧卡文仙尼喺補時錦上添花，意大利贏3比0，近5戰全勝。

淨得球落後榜首挪威16球

I組首名直接出線席位成為挪威同意大利之爭，雙方仲有2場賽事，包括最後1輪正面交鋒，意大利淨得球只有10球，挪威多達26球，意軍要大炒呢支有曼城神鋒艾寧夏蘭特助陣嘅北歐勁旅，先至有望反超前，機會非常渺茫。除非挪威下輪主場失分畀愛沙尼亞，意大利爭首名先至有價講，否則只能以次名踢附加賽，隨時重演上屆世盃外附加賽出局悲劇。

上一則 :

下一則 :